3,411

اب حشر اُٹھا کیوں‌ نہیں‌ دیتے


بے دم ہوئے بیمار دوا کیوں‌ نہیں ‌دیتے
تم اچھے مسیحا ہو شفا کیوں‌ نہیں ‌دیتے

دردِ شبِ ہجراں‌ کی جزا کیوں‌ نہیں دیتے
خونِ دلِ وحشی کا صلہ کیوں ‌نہیں دیتے

ہاں ‌نکتہ ورو لاؤ لب و دل کی گواہی
ہاں‌ نغمہ گرو ساز‌ صدا کیوں‌ نہیں‌ دیتے

مِٹ‌ جائے گی مخلوق تو انصاف کرو گے
منصف ہو تو اب حشر اُٹھا کیوں‌ نہیں‌ دیتے

پیمانِ جنوں‌ ہاتھوں‌کو شرمائے گا کب تک
دل والو گریباں‌ کا پتہ کیوں‌ نہیں‌ دیتے

بربادیٔ دل جبر نہیں‌ فیض کسی کا
وہ دشمنِ جاں‌ ہے تو بُھلا کیوں‌نہیں‌ دیتے

-فیض احمد فیض

?Mitt Jaye Gi Makhlooq To Insaaf Karo Gay
Munsif Ho To Ab Hashar Utha Kion Nahin Detay


اس پوسٹ پر اپنی رائے کا اظہار کریں

اپنا تبصرہ بھیجیں