پڑھ کتاباں رٹے لا لئے
ڈگری تمغے گل وچ پا لئے
ہن دنیا وچ پھسدا جاویں
بے مقصد ای نسدا جاویں
تھاں تھاں کاروبار سجا لئے
دولت دے انبار لگا لئے
دوڑ تیری پر رکنی ناہیں
ہوس کدی وی مکنی ناہیں
جین دا مقصد پل جاویں گا
دوڑ دوڑ کے رل جاویں گا
مشکل تیری ود دی جانیں
نیندر تیری کٹ دی جانیں
پیسے تیرے نال نیں جانے
ماپے ٹر گئے مڑ نیں آنے
پاویں رو رو ہوکاں ماریں
کلمے پڑ پڑ پھوکاں ماریں
بچیاں دا بچپن وی کھویں
فیر توں کلا بہ کے رویں
وقت پرانا یاد آوے گا
درد کلیجا کھا جاوے گا
کرنی ایں جے ٹھنڈی چھاتی
سونا ایں جے رج کے راتی
اج توں گھر نوں چھیتی آویں
ماپیاں نال کجھ وقت بتاویں
حال سنیں تے حال سناویں
دل تے چڑھیا بوجھ کٹاویں
بچیاں اپنے کول بٹھاویں
جو توں سکھیا کوٹ پیاویں
لاڈ اٹھاویں دل بہلاویں
کٹ کے اپنے سینے لاویں
پین پرا تے ماپے چھڈ کے
جس نے خون دے ناتے وڈ کے
تینوں منیا سر دا سائیں
توں وی رشتہ توڑ نبھائیں
اودے سارے دکھ سکھ ونڈیں
رشتہ دل دا دل نال گنڈیں
اپنے خول نوں چھل کے ویکھیں
اپنے نال وی مل کے ویکھیں
ویر تیرے نے نعمت رب دی
پیناں بنا خوشی نیں لب دی
خوشیاں ونڈ تے خوشیاں پا لے
مانی رب نوں یار بنا لے
ہر لمحہ توں ہس کے جی لے
پیار دی گڑوی پھڑ کے پی لے
اپنے اج توں ہو جا راضی
ایس جیون دی جت لے بازی
ایس جیون دی جت لے بازی……
بہت خوبصورت شاعری ہےِ شاعر کا نام اور وڈیو میں آواز بتا سکتے ہیںِ؟